FRANCISCI PETRARCA
CARMINA LATINA MINORA

TURRIS PARMENSIS
Imperiosa situ victrici condita dextra
turris ad astra levor, spectabilis intus et extra.
Corrigie splendor, fulget quo principe Parma,
bellipotens Azo me vult munimen ad arma.
Me videat securus amans hostisque tremiscat:
subdere colla iugo, vel poscere federa discat.

LINQUIMUS ITALIAM
   I
Linquimus Italiam, paulatim terra tumescit
et pedemontana valle tenemus iter.
II
Surgimus assidue, rigidam iam scandimus Alpem
asperiorque graves semita lassat equos.
Iupiter horrisono descendens turbine sevit,
et terras oculis eripuere nives.
III
Iam glaciale solum convexaque summa Gebenne
transgredimur, iam nos concomitantur aque.
Saxosus gelidusque viam Durentia monstrat
et Rodani ripas arvaque nota petens.
Ventus ab adverso violento murmure perflat
precipitansque nivem turbidus ora ferit.
Italie post terga manet pulcherrima tellus,
quam vetat etherii cernere montis apex;
ante procul colles et gallica rura patescunt.
Gentibus hic fuerat terminus, est et erit.

VALLIS CLAUSA
Valle locus Clausa toto michi nullus in orbe
gratior aut studiis aptior ora meis.
Valle puer Clausa fueram iuvenemque reversum
fovit in aprico vallis amena sinu.
Valle vir in Clausa meliores dulciter annos
exegi et vite candida fila mee.
Valle senex Clausa supremum ducere tempus
et Clausa cupio, te duce, Valle mori.